പോലീസിന്റെ രേഖാചിത്രത്തെയും ഇപ്പോൾ പിടികൂടിയ പ്രതിയുടെ രൂപത്തെയും താരതമ്മ്യപ്പെടുത്തി സൈബർ ഓർഗാസം അനുഭവിക്കുന്ന കുറച്ച് സൈക്കോപാത്തുക്കളെ കാണാൻ ഇടയായി.പോലീസിന്റെ രേഖാചിത്രം എന്നാൽ പ്രതിയെന്ന് സംശയിക്കപ്പെടുന്ന വ്യക്തിയെ നേരിൽ കണ്ട ഒന്നോ അതിലധികമോ ദൃത്സാക്ഷികൾ പറഞ്ഞുകൊടുക്കുന്ന അടയാളങ്ങൾ വെച്ച് തയ്യാറാക്കുന്ന ഒന്നാണ്. ഏതെങ്കിലും HD ചിത്രങ്ങൾ നോക്കി വരയ്ക്കുന്നതോ, പ്രതിയെ നോക്കി വരയ്ക്കുന്നതോ അല്ല എന്നിരിക്കെ പോലീസ് സ്കെച്ചിനെ കളിയാക്കുന്ന പിക്കാസോമാർക്ക് നല്ല നമസ്കാരം.ഒരു പ്രാവശ്യം മാത്രം കണ്ടതും, അതിലുപരി ഒരു ദുരന്തമുഖത്ത് ഏതാനും സെക്കന്റുകൾ കണ്ടതുമായ ഒരാളെക്കുറിച്ച് വിശദീകരിക്കാൻ പറഞ്ഞാൽ നമ്മളിൽ എത്രപേർക്ക് കൃത്യമായ അടയാളങ്ങളും, രൂപവും പറഞ്ഞുകൊടുക്കാനാകും?ഒരു ദിവസം ദൈനംദിന ജീവിതത്തിൽ നാം കാണുന്ന എത്രയാളുകളെക്കുറിച്ച് നമുക്ക് വ്യക്തതയോടെ വിശദീകരിക്കാനാകും?

രേഖാ ചിത്രം എന്നാൽ എന്താണ് എന്ന് മിനിമം ധാരണ പോലും ഇല്ലാത്തവരാണ് ട്രെയിനിൽ തീ ഇട്ടവന്റെ രേഖാ ചിത്രം വരച്ച ആളിനെ പരിഹസിക്കുന്നവർ.അത് പ്രതി മുന്നിൽ ഇരുന്ന് കൊടുത്ത് അയാളെ നോക്കി വരക്കുന്നതോ അല്ലെങ്കിൽ അയാളുടെ ഫോട്ടോ നോക്കി വരക്കുന്നതോ ആയിരുന്നെങ്കിൽ ഈ പരിഹാസം ചൊരിയുന്നവർ പറയുന്ന അധിക്ഷേപ വാക്കുകൾക്ക് എന്തെങ്കിലും അർത്ഥം ഉണ്ടായേനെ.സെൽഫി എടുത്തത് പോലൊക്കെ രേഖാ ചിത്രം വരയ്ക്കണം എന്നൊക്കെ വാശി പിടിക്കുന്നവർ ആരുടെയെങ്കിലും രേഖാ ചിത്രം ഒന്ന് അതുപോലെ വരച്ചു നോക്കുക.എന്നെ സംബന്ധിച്ച് ഒരാളെ ഒറ്റ നോട്ടത്തിൽ കണ്ടൊരു കാഴ്ച്ചയിൽ നിന്നും അയാളെ മറ്റൊരാൾക്ക്‌ വിവരിച്ചു കൊടുക്കുക പോലും അസാധ്യം. അതല്ലെങ്കിൽ അത്രക്കും നമ്മളെ സ്ട്രൈക്ക് ചെയ്യുന്ന എന്തെങ്കിലും പ്രത്യേകതകൾ ഒറ്റ നോട്ടത്തിൽ ശ്രദ്ധയിൽ പെട്ടുവെങ്കിൽ അത് ചിലപ്പോൾ ഓർത്തെന്ന് വരും.

ഒന്നോ അതിൽ കൂടുതൽ ആളുകളോ കണ്ട നിമിഷനേര കാഴ്ചകളിൽ നിന്നും, അവയവ, രൂപ, അലങ്കാര വർണ്ണനകളിൽ നിന്നും രൂപപ്പെടുത്തി എടുക്കുന്ന ഒരാളുടെ ചിത്രം എത്ര കണ്ട് അയാളുടെ ഒറിജിനൽ രൂപത്തോട് സദൃശ്യം തോന്നിക്കുമെന്ന് ഇത്തിരിയെങ്കിലും ചിന്തിക്കുന്ന ഏതൊരാളിനും മനസ്സിലാക്കാൻ സാധിക്കും.ബുദ്ധിയും വിവരവും ഉണ്ടെന്ന് കരുതിയവർ പോലും ഇതിന്റെ പേരിൽ അത് വരച്ച ആളിനെ പരിഹസിക്കുന്നത് കാണുമ്പോൾ വിഷമം തോന്നുന്നു.എത്രയും പെട്ടന്ന് പ്രതിയെ പിടിയിലാക്കിയ കേരളാപോലീസിനും മഹാരാഷ്ട്ര പോലീസിനും മറ്റു ടീം അംഗങ്ങൾക്കും അഭിനന്ദനങ്ങൾ.എന്തിലും കുറ്റം മാത്രം ചികയാൻ നോക്കുന്നവർ ഈ രണ്ടു ചിത്രവും വെച്ചു കണ്ണും മൂക്കും പുരികവും ഒക്കെയുള്ള സാമ്യം നോക്കി ട്രോളി രസിക്കുക

കടപ്പാട്